ಕುಶಾಲನಗರ: ಸಾಮಾನ್ಯವಾಗಿ ಇಂದಿನ ದಿನಗಳಲ್ಲಿ ಒಂದು ಸರ್ಕಾರಿ ಕೆಲಸ ಸಿಗಬೇಕೆಂದರೆ ಸಾವಿರಾರು ಜನ ಪೈಪೋಟಿ ನಡೆಸುತ್ತಾರೆ. ಒಮ್ಮೆ ಕೆಲಸ ಸಿಕ್ಕರೆ ಸಾಕು, ಜೀವನ ಪರ್ಯಂತ ನೆಮ್ಮದಿಯಾಗಿರಬಹುದು ಎಂದು ಭಾವಿಸುವವರೇ ಹೆಚ್ಚು. ಆದರೆ, ಕೊಡಗು ಜಿಲ್ಲೆಯ ಕುಶಾಲನಗರದಲ್ಲಿ ಪೊಲೀಸ್ ಪೇದೆಯೊಬ್ಬರು ಮಣ್ಣಿನ ಮೇಲಿನ ಮಮಕಾರಕ್ಕಾಗಿ ತಾವು ಕಷ್ಟಪಟ್ಟು ಪಡೆದಿದ್ದ ಸರ್ಕಾರಿ ಉದ್ಯೋಗವನ್ನೇ ತ್ಯಜಿಸಿ ಎಲ್ಲರ ಗಮನ ಸೆಳೆದಿದ್ದಾರೆ.
ಇದನ್ನು ಮಿಸ್ ಮಾಡದೇ ಓದಿ :ಹಳೆಯ ಪಿಂಚಣಿ ಯೋಜನೆ ಬಗ್ಗೆ ಮಹತ್ವದ ಮಾಹಿತಿ ನೀಡಿದ ಮುಖ್ಯಮಂತ್ರಿ ಸಿದ್ದರಾಮಯ್ಯ
ಶಿವಮೊಗ್ಗ ಜಿಲ್ಲೆಯ ಸಿರಿಗೆರೆ ಗ್ರಾಮದ ಮೂಲದವರಾದ ತೇಜಸ್ವಿ (32) ಅವರು ಕಳೆದ ಆರು ವರ್ಷಗಳಿಂದ ಕೊಡಗು ಜಿಲ್ಲೆಯ ಪೊಲೀಸ್ ಇಲಾಖೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದರು. ಸುಂಟಿಕೊಪ್ಪ ಮತ್ತು ಕುಶಾಲನಗರದ ಸಂಚಾರಿ ಪೊಲೀಸ್ ಠಾಣೆಗಳಲ್ಲಿ ಸಿವಿಲ್ ಕಾನ್ಸ್ಟೇಬಲ್ ಆಗಿ ಕರ್ತವ್ಯ ನಿರ್ವಹಿಸುತ್ತಿದ್ದ ಇವರು, ಇಲಾಖೆಯಲ್ಲಿ ದಕ್ಷ ಅಧಿಕಾರಿಯಾಗಿ ಗುರುತಿಸಿಕೊಂಡಿದ್ದರು. ವಿವಾಹಿತರಾಗಿರುವ ತೇಜಸ್ವಿ ಅವರಿಗೆ ಪತ್ನಿ ಹಾಗೂ ಇಬ್ಬರು ಮಕ್ಕಳಿದ್ದಾರೆ.
ತೇಜಸ್ವಿ ಅವರ ಸ್ವಗ್ರಾಮವಾದ ಸಿರಿಗೆರೆಯಲ್ಲಿ ಸುಮಾರು 10 ಎಕರೆ ಪಿತ್ರಾರ್ಜಿತ ಜಮೀನಿದೆ. ಇಷ್ಟು ದಿನ ಇವರ ತಂದೆ-ತಾಯಿಯ ಮೇಲ್ವಿಚಾರಣೆಯಲ್ಲಿ ಕಾರ್ಮಿಕರ ಸಹಾಯದಿಂದ ಕೃಷಿ ಚಟುವಟಿಕೆಗಳು ನಡೆಯುತ್ತಿದ್ದವು. ಆದರೆ, ದೂರವಿದ್ದು ಕೃಷಿಯನ್ನು ಮೇಲ್ನೋಟಕ್ಕೆ ನೋಡುವುದಕ್ಕಿಂತ, ಸ್ವತಃ ಮಣ್ಣಿಗಿಳಿದು ಬೆಳೆ ಬೆಳೆಯಬೇಕು ಎಂಬ ಹಂಬಲ ತೇಜಸ್ವಿ ಅವರಲ್ಲಿ ಬಲವಾಗಿತ್ತು. ಉದ್ಯೋಗದ ಒತ್ತಡದ ನಡುವೆ ಕೃಷಿಗೆ ಸಮಯ ನೀಡಲು ಸಾಧ್ಯವಾಗುತ್ತಿರಲಿಲ್ಲ. ಹೀಗಾಗಿ, “ಉದ್ಯೋಗಕ್ಕಿಂತ ಕೃಷಿಯೇ ಲೇಸು” ಎಂಬ ತೀರ್ಮಾನಕ್ಕೆ ಅವರು ಬಂದರು.
ತಮ್ಮ ಮನದ ಇಚ್ಛೆಯಂತೆ ಫೆಬ್ರವರಿ 28 ರಿಂದ ಜಾರಿಗೆ ಬರುವಂತೆ ಕೆಲಸದಿಂದ ಬಿಡುಗಡೆ ಮಾಡುವಂತೆ ತೇಜಸ್ವಿ ಅವರು ಕೊಡಗು ಜಿಲ್ಲಾ ಪೊಲೀಸ್ ಅಧೀಕ್ಷಕರಿಗೆ (SP) ಮನವಿ ಸಲ್ಲಿಸಿದ್ದರು. ಇಲಾಖೆಯ ಉನ್ನತ ಅಧಿಕಾರಿಗಳು ಇವರ ಕೃಷಿ ಪ್ರೇಮ ಮತ್ತು ಪ್ರಾಮಾಣಿಕ ಉದ್ದೇಶವನ್ನು ಕಂಡು ಅಚ್ಚರಿ ವ್ಯಕ್ತಪಡಿಸಿದರೂ, ಅವರ ವೈಯಕ್ತಿಕ ನಿರ್ಧಾರವನ್ನು ಗೌರವಿಸಿ ರಾಜೀನಾಮೆಯನ್ನು ಅಂಗೀಕರಿಸಿದ್ದಾರೆ. ಇತ್ತೀಚೆಗೆ ಅವರಿಗೆ ಅಧಿಕೃತವಾಗಿ ಕರ್ತವ್ಯದಿಂದ ಬಿಡುಗಡೆ ನೀಡಲಾಗಿದೆ.
ಇದನ್ನು ಮಿಸ್ ಮಾಡದೇ ಓದಿ : ನಿಮ್ಮ ದಾರಿಗೆ ಅಡ್ಡಲಾಗಿ ಬೆಕ್ಕು ಬಂದರೆ ಏನರ್ಥ? ಇದು ಅದೃಷ್ಟವೋ ಅಥವಾ ಕೆಟ್ಟ ಶಕುನವೋ?
ಇಂದಿನ ಕಾಲದಲ್ಲಿ ಕೃಷಿಯನ್ನು ಕೀಳಾಗಿ ಕಾಣುವವರ ಮಧ್ಯೆ, ಸುಭದ್ರವಾದ ಸರ್ಕಾರಿ ಕೆಲಸವನ್ನು ಬಿಟ್ಟು ಕೃಷಿಗೆ ಮರಳುತ್ತಿರುವ ತೇಜಸ್ವಿ ಅವರ ನಿರ್ಧಾರ ಸಾರ್ವಜನಿಕ ವಲಯದಲ್ಲಿ ಭಾರಿ ಚರ್ಚೆಗೆ ಗ್ರಾಸವಾಗಿದೆ. “ನಮ್ಮ ದೇಶದ ಬೆನ್ನೆಲುಬು ರೈತ. ಮಣ್ಣಿನಲ್ಲಿ ದುಡಿದರೆ ಸಿಗುವ ತೃಪ್ತಿ ಬೇರೆಲ್ಲೂ ಸಿಗುವುದಿಲ್ಲ” ಎಂಬ ಸಂದೇಶವನ್ನು ಇವರು ತಮ್ಮ ಕೃತಿಯ ಮೂಲಕ ಸಾರಿದ್ದಾರೆ.
ತೇಜಸ್ವಿ ಅವರು ಈಗ ತಮ್ಮ ಗ್ರಾಮಕ್ಕೆ ಮರಳಿ, ಹತ್ತು ಎಕರೆ ಜಮೀನಿನಲ್ಲಿ ಆಧುನಿಕ ಮತ್ತು ಸಮಗ್ರ ಕೃಷಿ ಪದ್ಧತಿಯನ್ನು ಅಳವಡಿಸಿಕೊಳ್ಳುವ ಯೋಜನೆ ಹೊಂದಿದ್ದಾರೆ. ಖಾಕಿ ಸಮವಸ್ತ್ರ ಕಳಚಿಟ್ಟು, ಕೈಯಲ್ಲಿ ನೇಗಿಲು ಹಿಡಿದು ರೈತನಾಗಿ ಹೊಸ ಜೀವನ ಆರಂಭಿಸುತ್ತಿರುವ ಈ ‘ಮಾಜಿ ಪೊಲೀಸ್’ ಯುವ ರೈತನಿಗೆ ಸಾರ್ವಜನಿಕರಿಂದ ಹಾರೈಕೆಗಳ ಮಹಾಪೂರವೇ ಹರಿದುಬರುತ್ತಿದೆ.
