ಯಶೋಗಾಥೆ: ಸಾಮಾನ್ಯ ರೈತ ಕುಟುಂಬದಿಂದ ಬಂದು, ಜಗತ್ತಿನ ದೈತ್ಯ ಟೆಕ್ ಕಂಪನಿಗಳಲ್ಲಿ ಒಂದಾದ ‘ಅಮೆಜಾನ್’ನಲ್ಲಿ ಉದ್ಯೋಗ ಗಿಟ್ಟಿಸಿಕೊಂಡ ಶೈಲೇಂದ್ರ ಯಾದವ್ ಅವರ ಕಥೆ ಇಂದು ಲಕ್ಷಾಂತರ ಯುವಕರಿಗೆ ಸ್ಫೂರ್ತಿಯಾಗಿದೆ.
ಇದು ಕೇವಲ ಒಬ್ಬ ಯುವಕನ ಉದ್ಯೋಗದ ಕಥೆಯಲ್ಲ.. ಒಬ್ಬ ತಂದೆಯ ಪರಿಶ್ರಮ, ತ್ಯಾಗ ಮತ್ತು ಮಗನ ಕನಸುಗಳ ಮೇಲಿದ್ದ ನಂಬಿಕೆಗೆ ಸಿಕ್ಕ ಪ್ರತಿಫಲ. ಶೈಲೇಂದ್ರ ತಮ್ಮ ಇಡೀ ಕುಟುಂಬದಲ್ಲೇ ಇಂಜಿನಿಯರಿಂಗ್ ಮುಗಿಸಿದ ಮೊದಲ ವ್ಯಕ್ತಿ. ಈಗ ಅವರು ಅಮೆಜಾನ್ ಕಂಪನಿಯಲ್ಲಿ ‘ಸಾಫ್ಟ್ವೇರ್ ಡೆವಲಪ್ಮೆಂಟ್ ಇಂಜಿನಿಯರ್’ (SDE) ಆಗಿ ನೇಮಕಗೊಂಡಿದ್ದಾರೆ.
ವೈರಲ್ ಆಯ್ತು ಭಾವುಕ ವಿಡಿಯೋ:
ಕೆಲವು ದಿನಗಳ ಹಿಂದೆ ಶೈಲೇಂದ್ರ ಅವರು ತಮ್ಮ ತಂದೆಗೆ ಅಮೆಜಾನ್ ಕಂಪನಿಯ ಆಫರ್ ಲೆಟರ್ ತೋರಿಸುತ್ತಿರುವ ವಿಡಿಯೋ ಒಂದನ್ನು ಸೋಶಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದರು. ಮಗ ಸಾಧಿಸಿದ ಅಪೂರ್ವ ಗೆಲುವನ್ನು ನೋಡಿ ಆ ತಂದೆಯ ಕಣ್ಣುಗಳಿಂದ ಆನಂದಭಾಷ್ಪ ಉರುಳಿತ್ತು. ದಶಕಗಳ ಕಷ್ಟ, ಹೋರಾಟಗಳು ಒಂದೇ ಕ್ಷಣದಲ್ಲಿ ಸಾರ್ಥಕವಾದ ಆ ದೃಶ್ಯ ಇಂಟರ್ನೆಟ್ನಲ್ಲಿ ಸಖತ್ ವೈರಲ್ ಆಗಿತ್ತು. ಈ ತಂದೆ-ಮಗನ ಅಪರೂಪದ ಪ್ರೀತಿಯನ್ನು ಕಂಡು ಲಕ್ಷಾಂತರ ನೆಟ್ಟಿಗರು ಭಾವುಕರಾಗಿದ್ದರು.
ಅಮೆಜಾನ್ ನೀಡಿದ ಸರ್ಪ್ರೈಸ್ ಗಿಫ್ಟ್:
ಈ ಭಾವುಕ ವಿಡಿಯೋ ಅಮೆಜಾನ್ ಕಂಪನಿಯ ಗಮನವನ್ನೂ ಸೆಳೆಯಿತು. ಶೈಲೇಂದ್ರ ಅವರ ಯಶಸ್ಸಿನ ಹಿಂದಿರುವ ತಂದೆಯ ಕಷ್ಟವನ್ನು ಗುರುತಿಸಿದ ಕಂಪನಿಯು, ಆ ಕುಟುಂಬಕ್ಕೆ ಒಂದು ವಿಶೇಷವಾದ ‘ಸರ್ಪ್ರೈಸ್ ಗಿಫ್ಟ್ ಹ್ಯಾಂಪರ್’ ಅನ್ನು ಕಳುಹಿಸಿಕೊಟ್ಟಿದೆ.
ಆ ಉಡುಗೊರೆಯ ಪ್ಯಾಕೇಜ್ ಅನ್ನು ತಂದೆ ತೆರೆಯುವಾಗ ಅವರ ಮುಖದಲ್ಲಿದ್ದ ಸಂತೋಷ ಅಷ್ಟಿಷ್ಟಲ್ಲ. ಆ ಗಿಫ್ಟ್ ಹ್ಯಾಂಪರ್ನಲ್ಲಿ ಒಂದು ಟಿ-ಶರ್ಟ್, ‘Dad’ (ಅಪ್ಪ) ಎಂದು ಬರೆದಿರುವ ಕ್ಯಾಪ್, ಒಂದು ಮಗ್, ಪೆನ್, ಚಾಕೊಲೇಟ್ಗಳು ಮತ್ತು ಒಂದು ಸಣ್ಣ ಗಿಡ ಇತ್ತು. ಇವುಗಳ ಜೊತೆಗೆ, ತಂದೆಯ ನಂಬಿಕೆಯೇ ಈ ಯಶಸ್ಸಿನ ತಳಹದಿ ಎಂದು ಶ್ಲಾಘಿಸಿ ಕಂಪನಿಯು ಒಂದು ಹೃದಯಸ್ಪರ್ಶಿ ಪತ್ರವನ್ನು ಸಹ ಕಳುಹಿಸಿತ್ತು.
”ಒಂದು ಕಾಲದಲ್ಲಿ ಅಪ್ಪ ಆಫರ್ ಲೆಟರ್ ಕೈಯಲ್ಲಿ ಹಿಡಿದು ಆನಂದದಿಂದ ಅತ್ತಿದ್ದರು. ಆಗಲೇ ನನಗೆ ಅರ್ಥವಾಗಿದ್ದು, ಈ ಕನಸು ಕೇವಲ ನನ್ನದಷ್ಟೇ ಅಲ್ಲ, ನನ್ನ ತಂದೆಯದು ಕೂಡ ಎಂದು. ಪ್ರತಿಯೊಂದು ಕಷ್ಟದ ಸಮಯದಲ್ಲಿ, ಪ್ರತಿಯೊಂದು ತ್ಯಾಗದಲ್ಲೂ ಅಪ್ಪ ನನ್ನ ಬೆನ್ನಿಗೆ ನಿಂತಿದ್ದರು” ಎಂದು ಶೈಲೇಂದ್ರ ತಮ್ಮ ಭಾವನೆಗಳನ್ನು ಹಂಚಿಕೊಂಡಿದ್ದಾರೆ.
ಕಷ್ಟದ ಹಾದಿಯಲ್ಲಿ ಯಶಸ್ಸಿನ ಶಿಖರ
ಶೈಲೇಂದ್ರ ಅವರ ಈ ಪ್ರಯಾಣ ಅಷ್ಟು ಸುಲಭವಾಗಿರಲಿಲ್ಲ. ರೈತ ಕುಟುಂಬವಾದ್ದರಿಂದ ಆರ್ಥಿಕ ಸಂಕಷ್ಟಗಳು ಸದಾ ಇರುತ್ತಿದ್ದವು. ಮಗನಿಗೆ ಉತ್ತಮ ಶಿಕ್ಷಣ ನೀಡಲು ತಂದೆ ಕೃಷಿಯ ಜೊತೆಗೆ ಸಣ್ಣಪುಟ್ಟ ಕೆಲಸಗಳನ್ನೂ ಮಾಡುತ್ತಿದ್ದರು. ಸಂಪನ್ಮೂಲಗಳ ಕೊರತೆಯಿದ್ದರೂ, ಮಗನ ಕನಸುಗಳಿಗೆ ಅವರು ಎಂದೂ ಅಡ್ಡಿ ಬರಲಿಲ್ಲ.
ಇಂದು ಶೈಲೇಂದ್ರ ಸಾಧಿಸಿದ ಯಶಸ್ಸು ಕೇವಲ ಅವರ ವೈಯಕ್ತಿಕ ಸಾಧನೆಯಲ್ಲ.. ತಮ್ಮ ಮಕ್ಕಳ ಭವಿಷ್ಯಕ್ಕಾಗಿ ಹಗಲಿರುಳು ಶ್ರಮಿಸುವ ಪ್ರತಿಯೊಬ್ಬ ಪೋಷಕರಿಗೆ ಸಂದ ಗೌರವ. ಕುಟುಂಬದ ಬೆಂಬಲ ಮತ್ತು ಕಠಿಣ ಪರಿಶ್ರಮವಿದ್ದರೆ ಎಂತಹ ಗುರಿಯನ್ನೂ ತಲುಪಬಹುದು ಎಂಬುದಕ್ಕೆ ಈ ಯುವಕನೇ ಸಾಕ್ಷಿ.
