ಬೆಂಗಳೂರು: ರಾಜ್ಯದ ಜನಸಾಮಾನ್ಯರಿಗೆ ಕಂದಾಯ ಇಲಾಖೆ ಸಿಹಿ ಸುದ್ದಿಯೊಂದನ್ನು ನೀಡಿದೆ. ಇನ್ಮುಂದೆ ಜಮೀನಿನ ಖಾತೆ ಬದಲಾವಣೆ (Mutation) ಮಾಡಿಸಲು ಸರ್ಕಾರಿ ಕಚೇರಿಗಳಿಗೆ ಅಲೆಯುವ ಅಗತ್ಯವಿಲ್ಲ. ಕಂದಾಯ ಸಚಿವ ಕೃಷ್ಣ ಬೈರೇಗೌಡ ಅವರು ‘ಸ್ವಯಂ ಚಾಲಿತ ಮ್ಯುಟೇಷನ್’ (Automatic Mutation) ಪ್ರಕ್ರಿಯೆಗೆ ಅಧಿಕೃತವಾಗಿ ಚಾಲನೆ ನೀಡಿದ್ದಾರೆ.
ಈ ಹೊಸ ವ್ಯವಸ್ಥೆಯಿಂದಾಗಿ ಸಾರ್ವಜನಿಕರು ತಮ್ಮ ಮೊಬೈಲ್ ಮೂಲಕವೇ ಆನ್ಲೈನ್ನಲ್ಲಿ ಖಾತೆ ಬದಲಾವಣೆ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಬಹುದಾಗಿದೆ.
ಏನಿದು ಸ್ವಯಂ ಚಾಲಿತ ಮ್ಯುಟೇಷನ್?
ಈ ಹಿಂದೆ ಖಾತೆ ಬದಲಾವಣೆಗಾಗಿ ಕಂದಾಯ ನಿರೀಕ್ಷಕರು (RI) ಕಚೇರಿಗೆ ಬಂದು ಡಿಜಿಟಲ್ ಸಹಿ ಹಾಕುವವರೆಗೆ ಕಾಯಬೇಕಿತ್ತು. ಆದರೆ ಈಗ ತಂತ್ರಜ್ಞಾನದ ಸುಧಾರಣೆಯಿಂದಾಗಿ, ಯಾವುದೇ ತಕರಾರು ಇಲ್ಲದ ಪ್ರಕರಣಗಳಲ್ಲಿ ನಿಗದಿತ ಅವಧಿಯ ನಂತರ ಸಿಸ್ಟಮ್ ತಾನಾಗಿಯೇ ಖಾತೆ ಬದಲಾವಣೆಯನ್ನು ಮಾಡುತ್ತದೆ.
ಖಾತೆ ಬದಲಾವಣೆ ಪ್ರಕ್ರಿಯೆ ಹೇಗೆ ನಡೆಯುತ್ತದೆ?
ಸಚಿವರು ವಿವರಿಸಿದಂತೆ, ಈ ಪ್ರಕ್ರಿಯೆಯು ಈ ಕೆಳಗಿನ ಹಂತಗಳಲ್ಲಿ ನಡೆಯುತ್ತದೆ:
ನೋಂದಾಯಿತ ಪ್ರಕರಣಗಳು: ಆನ್ಲೈನ್ ಮೂಲಕ ಅರ್ಜಿ ಸಲ್ಲಿಸಿದ ನಂತರ 7 ದಿನಗಳ ನೋಟಿಸ್ ಅವಧಿ ಇರುತ್ತದೆ. ಈ ಅವಧಿಯಲ್ಲಿ ಯಾರೂ ತಕರಾರು ಸಲ್ಲಿಸದಿದ್ದರೆ, 8ನೇ ದಿನಕ್ಕೆ ಸ್ವಯಂಚಾಲಿತವಾಗಿ ಖಾತೆ ಬದಲಾವಣೆಯಾಗುತ್ತದೆ.
ನೋಂದಣಿಯೇತರ ಪ್ರಕರಣಗಳು: ಇವುಗಳಿಗೆ 15 ದಿನಗಳ ನೋಟಿಸ್ ಅವಧಿ ಇರುತ್ತದೆ. ತಕರಾರು ಇಲ್ಲದಿದ್ದರೆ 16ನೇ ದಿನಕ್ಕೆ ಖಾತೆ ಬದಲಾವಣೆ ಪೂರ್ಣಗೊಳ್ಳುತ್ತದೆ.
ತಕರಾರು ಇದ್ದರೆ : ಒಂದು ವೇಳೆ ಯಾರಾದರೂ ತಕರಾರು ಸಲ್ಲಿಸಿದರೆ, ಅಂತಹ ಪ್ರಕರಣಗಳನ್ನು 60 ದಿನಗಳ ಒಳಗಾಗಿ ಇತ್ಯರ್ಥಪಡಿಸಲಾಗುತ್ತದೆ.
ಯಾವೆಲ್ಲಾ ಸೇವೆಗಳು ಲಭ್ಯ?
ಈಗಾಗಲೇ ಶೇ.98 ರಷ್ಟು ಖಾತೆ ಬದಲಾವಣೆಗಳನ್ನು ಸ್ವಯಂಚಾಲಿತಗೊಳಿಸಲಾಗಿದೆ. ಇದರಲ್ಲಿ ಮುಖ್ಯವಾಗಿ:
ಹಕ್ಕು-ಬಾಧ್ಯತೆ ದಾಖಲಾತಿ ಮತ್ತು ಋಣ ಮುಕ್ತ ಪ್ರಕ್ರಿಯೆ.
ಭೂ ಪರಿವರ್ತನೆ (Land Conversion) ಮತ್ತು ಪೋಡಿ ಕಾರ್ಯಗಳು.
ಭೂಸ್ವಾಧೀನ, ನ್ಯಾಯಾಲಯದ ಆದೇಶ ಮತ್ತು ತಡೆಯಾಜ್ಞೆಗಳ ನಮೂದು.
ಸಾಗುವಳಿ ಚೀಟಿ ನಮೂದು ಮತ್ತು ಪಹಣಿ ವರ್ಗಾವಣೆ.
ಪಹಣಿಗೆ ಆಧಾರ್ ಜೋಡಣೆ ಅತ್ಯಗತ್ಯ!
ಜಮೀನಿನ ಮಾಲೀಕತ್ವವನ್ನು ಮತ್ತಷ್ಟು ಸುಭದ್ರಗೊಳಿಸಲು ಸಚಿವರು ಸಾರ್ವಜನಿಕರಲ್ಲಿ ಒಂದು ಪ್ರಮುಖ ಮನವಿ ಮಾಡಿದ್ದಾರೆ. “ನಿಮ್ಮ ಪಹಣಿ (RTC) ಜೊತೆಗೆ ಆಧಾರ್ ಜೋಡಣೆ ಮಾಡುವುದರಿಂದ, ನಿಮ್ಮ ಗಮನಕ್ಕೆ ಬಾರದೆ ನಡೆಯುವ ನಕಲಿ ವಹಿವಾಟುಗಳನ್ನು ತಡೆಯಬಹುದು. ಪಹಣಿಯಲ್ಲಿ ಯಾವುದೇ ಬದಲಾವಣೆಯಾದರೂ ತಕ್ಷಣ ನಿಮ್ಮ ಮೊಬೈಲ್ಗೆ ಎಸ್ಎಂಎಸ್ (SMS) ಬರುತ್ತದೆ,” ಎಂದು ಅವರು ತಿಳಿಸಿದ್ದಾರೆ.
