ನಿಮ್ಮ ಫ್ರಿಡ್ಜ್‌ನಲ್ಲಿ ಈ ಒಂದು ಬಟನ್ ಒತ್ತಿ, ಕರೆಂಟ್ ಬಿಲ್ ಅರ್ಧದಷ್ಟು ಉಳಿಸಿ!

ಮನೆಯಲ್ಲಿ ಅತಿ ಹೆಚ್ಚು ವಿದ್ಯುತ್ ಬಳಸುವ ಉಪಕರಣಗಳಲ್ಲಿ ರೆಫ್ರಿಜರೇಟರ್ (ಫ್ರಿಡ್ಜ್) ಕೂಡ ಒಂದು. ಚಳಿಗಾಲ, ಬೇಸಿಗೆ ಅಥವಾ ಮಳೆಗಾಲವಾಗಿರಲಿ, ಆಹಾರವನ್ನು ತಾಜಾವಾಗಿಡಲು ಫ್ರಿಡ್ಜ್ 24/7 ಆನ್ ಆಗಿಯೇ ಇರುತ್ತದೆ. ತಜ್ಞರ ಪ್ರಕಾರ, ಮನೆಯ ಒಟ್ಟು ವಿದ್ಯುತ್‌ ಬಳಕೆಯಲ್ಲಿ ಶೇ.8 ರಿಂದ 13 ರಷ್ಟು ವಿದ್ಯುತ್ ಫ್ರಿಡ್ಜ್‌ಗೇ ಖರ್ಚಾಗುತ್ತದೆ.

ಫ್ರಿಡ್ಜ್‌ನ ಕಂಪ್ರೆಸರ್ (Compressor) ನಿರಂತರವಾಗಿ ಚಲಿಸುವುದರಿಂದ ಕರೆಂಟ್ ಬಿಲ್ ಹೆಚ್ಚಾಗುತ್ತದೆ. ಆದರೆ, ನಿಮ್ಮ ಫ್ರಿಡ್ಜ್‌ನಲ್ಲಿ ಕೆಲವು ಸಣ್ಣ ಬದಲಾವಣೆಗಳನ್ನು ಹಾಗೂ ಸೆಟ್ಟಿಂಗ್ ಮಾಡಿಕೊಳ್ಳುವ ಮೂಲಕ ಆಹಾರ ಕೆಡದಂತೆ ಕಾಪಾಡುವುದರ ಜೊತೆಗೆ ವಿದ್ಯುತ್ ಬಿಲ್ ಅನ್ನು ಗಣನೀಯವಾಗಿ ಕಡಿಮೆ ಮಾಡಬಹುದು. ಆ ಸರಳ ಟ್ರಿಕ್ಸ್‌ಗಳೇನು ಎಂಬುದನ್ನು ಇಲ್ಲಿ ತಿಳಿಯೋಣ.

ಫ್ರಿಡ್ಜ್‌ನ ಫ್ರೀಜರ್‌ನಲ್ಲಿ (Freezer) ಮಂಜುಗಡ್ಡೆ ಬೆಟ್ಟದಂತೆ ಶೇಖರಣೆಯಾಗಿದ್ದರೆ, ಅದು ಕಂಪ್ರೆಸರ್ ಮೇಲೆ ಅತಿಯಾದ ಒತ್ತಡವನ್ನು ಹಾಕುತ್ತದೆ. ಇದರಿಂದ ಫ್ರಿಡ್ಜ್ ಹೆಚ್ಚು ವಿದ್ಯುತ್ ಅನ್ನು ಎಳೆಯುತ್ತದೆ. ಇದನ್ನು ತಪ್ಪಿಸಲು ತಾಪಮಾನ ಸೆಟ್ಟಿಂಗ್‌ಗಳ ಕೆಳಗೆ ನೀಡಲಾಗಿರುವ ಡಿಫ್ರಾಸ್ಟ್ (Defrost) ಬಟನ್ ಅನ್ನು ಒತ್ತಿ.

ಇದನ್ನು ಒತ್ತುವುದರಿಂದ ಕಂಪ್ರೆಸರ್ ಆಫ್ ಆಗಿ, ಮಂಜುಗಡ್ಡೆ ಕರಗಲು ಆರಂಭವಾಗುತ್ತದೆ. ಇದರಿಂದ ಕಂಪ್ರೆಸರ್ ಮೇಲಿನ ಹೊರೆ ಕಡಿಮೆಯಾಗಿ, ವಿದ್ಯುತ್ ಬಳಕೆ ಗಮನಾರ್ಹವಾಗಿ ತಗ್ಗುತ್ತದೆ. ಇದು ನಿಮ್ಮ ಕರೆಂಟ್ ಬಿಲ್ ಉಳಿಸುವ ಪ್ರಮುಖ ಅಸ್ತ್ರವಾಗಿದೆ.

ತಾಪಮಾನ (Temperature) ಸೆಟ್ಟಿಂಗ್ ಹೀಗಿರಲಿ:
ಸಾಮಾನ್ಯವಾಗಿ ಫ್ರಿಡ್ಜ್‌ಗಳಲ್ಲಿ 1 ರಿಂದ 5 ಅಥವಾ 1 ರಿಂದ 6 ರವರೆಗೆ ತಾಪಮಾನ ಸೆಟ್ಟಿಂಗ್ ಇರುತ್ತದೆ. ಋತುಮಾನಕ್ಕೆ ತಕ್ಕಂತೆ ಇದನ್ನು ಬದಲಾಯಿಸುವುದು ಜಾಣತನ.

ಬೇಸಿಗೆಯಲ್ಲಿ: ತಾಪಮಾನವನ್ನು 4 ಅಥವಾ 5 ರಲ್ಲಿ ಇಡುವುದು ಸೂಕ್ತ.

ಚಳಿಗಾಲ/ಮಳೆಗಾಲದಲ್ಲಿ: ತಂಪಾಗಿಸುವಿಕೆಯ ಮಟ್ಟವನ್ನು 1, 2, ಅಥವಾ 3 ಕ್ಕೆ ಇಳಿಸಬಹುದು. ಈ ಹಂತದಲ್ಲಿ ಉಷ್ಣಾಂಶ 2-5°C ಇರುತ್ತದೆ. ಇದು ಕಡಿಮೆ ವಿದ್ಯುತ್ ಬಳಸಿ ಆಹಾರವನ್ನು ತಾಜಾವಾಗಿಡುತ್ತದೆ.

ಸೂಕ್ತ ತಾಪಮಾನ: ಫ್ರಿಡ್ಜ್‌ನ ಆದರ್ಶ ತಾಪಮಾನವು 1.7-3.3°C (35°F – 38°F) ನಡುವೆ ಇರಬೇಕು.

ಆಹಾರದ ಪ್ರಮಾಣಕ್ಕೆ ತಕ್ಕಂತೆ ಕೂಲಿಂಗ್ ಇರಲಿ:
ಫ್ರಿಡ್ಜ್‌ನಲ್ಲಿ ಹೆಚ್ಚು ವಸ್ತುಗಳಿಲ್ಲದಿದ್ದರೆ ಕೂಲಿಂಗ್ ಮಟ್ಟವನ್ನು ಕಡಿಮೆ ಮಾಡಿ. ಇದರಿಂದ ಅನಗತ್ಯ ವಿದ್ಯುತ್ ಪೋಲಾಗುವುದು ತಪ್ಪುತ್ತದೆ.

ಹೆಚ್ಚು ಆಹಾರವನ್ನು ಸಂಗ್ರಹಿಸಿದ್ದರೆ, ಕೂಲಿಂಗ್ ಮಟ್ಟವನ್ನು ಸ್ವಲ್ಪ ಹೆಚ್ಚಿಸಿ.

ಸಮುದ್ರಾಹಾರ ಅಥವಾ ಮಾಂಸಾಹಾರವನ್ನು ಫ್ರೀಜರ್‌ನಲ್ಲಿ ಸಂಗ್ರಹಿಸುವಾಗ -18°C ತಾಪಮಾನ ಕಾಯ್ದುಕೊಳ್ಳಿ. ಇದು ಬ್ಯಾಕ್ಟೀರಿಯಾ ತಡೆಗಟ್ಟಿ, ಆಹಾರವನ್ನು ಸುರಕ್ಷಿತವಾಗಿಡುತ್ತದೆ.

ವಿದ್ಯುತ್ ಉಳಿಸಲು ತಜ್ಞರ ಇತರ ಸಲಹೆಗಳು:
ಸರಿಯಾದ ಸ್ಥಳದ ಆಯ್ಕೆ: ಫ್ರಿಡ್ಜ್‌ನ ಹಿಂಭಾಗ ಮತ್ತು ಬದಿಗಳಿಂದ ಶಾಖ ಹೊರಹೋಗಲು ಗೋಡೆಯಿಂದ ಸ್ವಲ್ಪ ಅಂತರವಿರಲಿ. ಸ್ಟೌವ್, ಓವನ್ ಅಥವಾ ಬಿಸಿಲು ಬೀಳುವ ಜಾಗದಲ್ಲಿ ಫ್ರಿಡ್ಜ್ ಇಡಬೇಡಿ.

ಬಾಗಿಲು ಹೆಚ್ಚು ಹೊತ್ತು ತೆಗೆಯಬೇಡಿ: ಫ್ರಿಡ್ಜ್ ಬಾಗಿಲನ್ನು ದೀರ್ಘಕಾಲ ತೆರೆದಿಟ್ಟರೆ ತಂಪಾದ ಗಾಳಿ ಹೊರಹೋಗಿ, ಕಂಪ್ರೆಸರ್ ಮತ್ತೆ ಕೂಲಿಂಗ್ ಮಾಡಲು ಹೆಚ್ಚು ಕರೆಂಟ್ ಬಳಸುತ್ತದೆ.

ಗಾಜು ಅಥವಾ ಸೆರಾಮಿಕ್ ಪಾತ್ರೆ ಬಳಸಿ: ಪ್ಲಾಸ್ಟಿಕ್ ಪಾತ್ರೆಗಳಿಗಿಂತ ಗಾಜು ಮತ್ತು ಸೆರಾಮಿಕ್ ಪಾತ್ರೆಗಳು ತಂಪನ್ನು ಬೇಗನೆ ಹೀರಿಕೊಂಡು ಹಿಡಿದಿಟ್ಟುಕೊಳ್ಳುತ್ತವೆ. ಇದರಿಂದ ಫ್ರಿಡ್ಜ್ ಬೇಗನೆ ಕೂಲ್ ಆಗುತ್ತದೆ.

ನಿಯಮಿತ ಸ್ವಚ್ಛತೆ : ಪ್ರತಿ 1 ರಿಂದ 3 ತಿಂಗಳಿಗೊಮ್ಮೆ ಫ್ರಿಡ್ಜ್ ಅನ್ನು ಸ್ವಚ್ಛಗೊಳಿಸಿ. ಕೂಲಿಂಗ್ ದ್ವಾರಗಳಲ್ಲಿ ಧೂಳು ಕಟ್ಟಿಕೊಂಡರೆ ಕಂಪ್ರೆಸರ್ ಹೆಚ್ಚು ಕೆಲಸ ಮಾಡಬೇಕಾಗುತ್ತದೆ.