ಬೆಳಗಾವಿ ಜಿಲ್ಲೆಯಲ್ಲಿ ಮಗಳ ಸಂಸಾರಕ್ಕೆ ಆಸರೆಯಾಗಬೇಕಿದ್ದ ಹೆತ್ತ ತಾಯಿಯೇ ಮಗಳ ಮನೆಯಲ್ಲಿ ಕಳ್ಳತನ ಮಾಡಿ ಜೈಲು ಪಾಲಾಗಿರುವ ಆಘಾತಕಾರಿ ಘಟನೆ ವರದಿಯಾಗಿದೆ. ಈ ವಿಚಿತ್ರ ಪ್ರಕರಣವು ಬೆಳಗಾವಿಯ ಪೀರನವಾಡಿ ವ್ಯಾಪ್ತಿಯಲ್ಲಿ ನಡೆದಿದ್ದು, ಮಗಳ ಮನೆಯಲ್ಲಿದ್ದ ಲಕ್ಷಾಂತರ ರೂಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ಕದ್ದು ತನ್ನಿಬ್ಬರು ಕಿರಿಯ ಹೆಣ್ಣುಮಕ್ಕಳ ಭವಿಷ್ಯ ರೂಪಿಸಲು ಹೋದ ತಾಯಿ ಈಗ ಕಾನೂನಿನ ಸಂಕೋಲೆಗೆ ಸಿಲುಕಿದ್ದಾರೆ. ಹೆತ್ತ ತಾಯಿಯೇ ಮಗಳ ಮನೆಗೆ ಕನ್ನ ಹಾಕಿರುವ ಈ ವೃತ್ತಾಂತವು ಸಮಾಜದಲ್ಲಿ ಸಂಚಲನ ಮೂಡಿಸಿದೆ.
ಪೀರನವಾಡಿ ನಿವಾಸಿ ಉಜ್ವಲ ಕಮ್ಮಾರ್ ಎಂಬುವವರ ಮನೆಯಲ್ಲಿ ಈ ಘಟನೆ ಸಂಭವಿಸಿದೆ. ಉಜ್ವಲ ಅವರ ತಾಯಿ ತನ್ನ ಮಗಳ ಮನೆಗೆ ಅತಿಥಿಯಾಗಿ ಆಗಮಿಸಿದ್ದರು. ತಾಯಿ ಮಗಳ ಮನೆಗೆ ಬಂದಾಗ ಮಗಳು ಮತ್ತು ಅಳಿಯ ಯಾವುದೇ ಸಂಶಯವಿಲ್ಲದೆ ಅವರನ್ನು ಬರಮಾಡಿಕೊಂಡಿದ್ದರು. ಒಂದು ದಿನ ಮಗಳು ಮತ್ತು ಅಳಿಯ ಯಾವುದೋ ತುರ್ತು ಕಾರ್ಯಕ್ರಮ ನಿಮಿತ್ತ ಮನೆಯಿಂದ ಹೊರಗೆ ಹೋಗಿದ್ದ ಸಂದರ್ಭವನ್ನು ಗಮನಿಸಿದ ತಾಯಿ, ಮನೆಯ ಬೀರು ನಲ್ಲಿದ್ದ ಅಮೂಲ್ಯ ಆಭರಣಗಳ ಮೇಲೆ ಕಣ್ಣು ಹಾಕಿದ್ದಾರೆ. ಸುಮಾರು 110 ಗ್ರಾಂ ತೂಕದ 16 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣಗಳನ್ನು ಯಾರಿಗೂ ತಿಳಿಯದಂತೆ ದೋಚಿದ್ದಾರೆ.
ಇದನ್ನೂ ಓದಿ : Parappana Agrahara Jail | ಜೈಲಿನಲ್ಲಿದ್ದುಕೊಂಡೇ ಪತ್ನಿಗೆ ವಿಡಿಯೋ ಕಾಲ್
ಇದನ್ನೂ ಓದಿ : ಶ್ರಮಿಕರ ಬದುಕಿಗೆ ಆಸರೆಯಾಗುವ ಕರ್ನಾಟಕ ಸರ್ಕಾರದ ವಿವಿಧ ಕಲ್ಯಾಣ ಯೋಜನೆಗಳ ಬಗ್ಗೆ ಮಾಹಿತಿ ಇಲ್ಲಿದೆ
ದಂಪತಿಗಳು ಕಾರ್ಯಕ್ರಮ ಮುಗಿಸಿ ಮನೆಗೆ ವಾಪಸ್ ಬಂದಾಗ ಮನೆಯಲ್ಲಿದ್ದ ಚಿನ್ನಾಭರಣಗಳು ಕಾಣೆಯಾಗಿರುವುದು ಅವರ ಗಮನಕ್ಕೆ ಬಂದಿದೆ. ತಕ್ಷಣವೇ ಮನೆಯಲ್ಲಿದ್ದ ತಾಯಿಯನ್ನು ವಿಚಾರಿಸಿದಾಗ ಆಕೆ ತನಗೇನೂ ತಿಳಿಯದು ಎಂದು ಹಾರಿಕೆ ಉತ್ತರ ನೀಡಿದ್ದಾರೆ. ಮನೆಯಲ್ಲಿ ಯಾವುದೇ ಬೀಗ ಮುರಿದ ಲಕ್ಷಣಗಳು ಕಾಣದಿದ್ದರೂ ಒಡವೆಗಳು ಮಾಯವಾಗಿದ್ದು ದಂಪತಿಗಳಲ್ಲಿ ತೀವ್ರ ಆತಂಕ ಮೂಡಿಸಿದೆ. ಅಂತಿಮವಾಗಿ ಬೇರೆ ದಾರಿಯಿಲ್ಲದೆ ಅವರು ಬೆಳಗಾವಿಯ ತಿಲಕವಾಡಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದಾರೆ.
ತಿಲಕವಾಡಿ ಪೊಲೀಸರು ಪ್ರಕರಣದ ಗಂಭೀರತೆಯನ್ನು ಅರಿತು ತನಿಖೆ ಆರಂಭಿಸಿದಾಗ ಸತ್ಯಾಂಶ ಹೊರಬಂದಿದೆ. ಪೊಲೀಸರು ಮನೆಯಲ್ಲಿದ್ದವರನ್ನು ತೀವ್ರ ವಿಚಾರಣೆಗೆ ಒಳಪಡಿಸಿದಾಗ ತಾಯಿಯ ವರ್ತನೆಯಲ್ಲಿ ಅನುಮಾನ ಕಂಡುಬಂದಿದೆ. ಆರಂಭದಲ್ಲಿ ಪೊಲೀಸರ ಮುಂದೆ ಬಹಳ ನಾಟಕವಾಡಿದ ತಾಯಿ ನಂತರ ಸತತ ವಿಚಾರಣೆಯ ಎದುರು ಸತ್ಯ ಒಪ್ಪಿಕೊಂಡಿದ್ದಾರೆ. ಆಕೆ ತನ್ನಿಬ್ಬರು ಸಣ್ಣ ಮಗಳಂದಿರ ಮದುವೆಗಾಗಿ ಹಣ ಹೊಂದಿಸಲು ಈ ಕಳ್ಳತನದ ದಾರಿ ಹಿಡಿದಿರುವುದಾಗಿ ಪೊಲೀಸರ ಮುಂದೆ ಹೇಳಿಕೆ ನೀಡಿದ್ದಾರೆ.
ಈ ಅಪರಾಧ ಕೃತ್ಯದಲ್ಲಿ ತಾಯಿಗೆ ಆಕೆಯ ಸಂಬಂಧಿ ಶಿವ ಎಂಬಾತ ಕೂಡ ಸಾಥ್ ನೀಡಿದ್ದಾನೆ ಎನ್ನುವ ಅಂಶ ಬೆಳಕಿಗೆ ಬಂದಿದೆ. ಪೊಲೀಸರು ಸದ್ಯ ತಾಯಿ ಮತ್ತು ಆಕೆಗೆ ಸಹಕರಿಸಿದ ಸಂಬಂಧಿ ಶಿವ ಇಬ್ಬರನ್ನೂ ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ. ಕದ್ದ ಮಾಲುಗಳನ್ನು ವಶಪಡಿಸಿಕೊಳ್ಳುವ ಪ್ರಕ್ರಿಯೆ ನಡೆಯುತ್ತಿದೆ. ಹೆತ್ತ ತಾಯಿಯೇ ಮಗಳ ಬದುಕಿನಲ್ಲಿ ಬಿರುಗಾಳಿ ಎಬ್ಬಿಸಿರುವುದು ಬೆಳಗಾವಿ ಜನತೆಯನ್ನು ದಿಗಿಲುಗೊಳಿಸಿದೆ.
