ತುಮಕೂರು: ಅಮೆರಿಕದ ಪ್ರತಿಷ್ಠಿತ ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯ ಮತ್ತು ಎಲ್ಸೆವಿಯರ್ ಪ್ರಕಟಣೆ ಜಂಟಿಯಾಗಿ ಹೊರತಂದಿರುವ 2026ನೇ ಸಾಲಿನ ವಿಶ್ವದ ಅಗ್ರ ಶೇಕಡಾ 2ರಷ್ಟು ವಿಜ್ಞಾನಿಗಳ ಪಟ್ಟಿಯಲ್ಲಿ ತುಮಕೂರಿನ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಗಣಿತಶಾಸ್ತ್ರ ವಿಭಾಗದ ಮುಖ್ಯಸ್ಥರಾದ ಡಾ. ಯೋಗೀಶ್ ಎನ್. ಅವರು ಸ್ಥಾನ ಪಡೆದಿದ್ದಾರೆ.
ಜಾಗತಿಕ ಮಟ್ಟದಲ್ಲಿ ಕೈಗೊಳ್ಳಲಾದ ಸಿಂಗಲ್-ಯಿರ್ ಸೈಂಟಿಫಿಕ್ ಇಂಪ್ಯಾಕ್ಟ್ 2026ರ ವಿಭಾಗದಲ್ಲಿ ಈ ಹೆಮ್ಮೆಯ ಸಾಧನೆ ದಾಖಲಾಗಿದೆ. ಸಂಶೋಧನಾ ಪ್ರಕಟಣೆಗಳಿಗೆ ದೊರೆತ ಉಲ್ಲೇಖಗಳು, ಹೆಚ್-ಇಂಡೆಕ್ಸ್, ಸಹಲೇಖಕತ್ವಕ್ಕೆ ಹೊಂದಾಣಿಕೆ ಮಾಡಿದ ಉಲ್ಲೇಖ ಸೂಚ್ಯಂಕಗಳು ಹಾಗೂ ವಿವಿಧ ಪ್ರಮಾಣೀಕೃತ ಶೈಕ್ಷಣಿಕ ಪ್ರಭಾವದ ಸೂಚಕಗಳನ್ನು ಆಧರಿಸಿ ವಿಶ್ವವಿದ್ಯಾಲಯವು ಈ ಪಟ್ಟಿಯನ್ನು ಸಿದ್ಧಪಡಿಸಿದೆ.
ಮಾಹಿತಿ ಮತ್ತು ಸಂವಹನ ತಂತ್ರಜ್ಞಾನ ಹಾಗೂ ಅನ್ವಯಿಕ ಗಣಿತಶಾಸ್ತ್ರ ಕ್ಷೇತ್ರದಲ್ಲಿ ನಡೆಸಿರುವ ಗಮನಾರ್ಹ ಸಂಶೋಧನೆಗಳಿಗಾಗಿ ಡಾ. ಯೋಗೀಶ್ ಎನ್. ಅವರ ಹೆಸರು ಈ ಅಂತರರಾಷ್ಟ್ರೀಯ ದತ್ತಾಂಶದಲ್ಲಿ ಸೇರ್ಪಡೆಯಾಗಿದೆ. ಸಂಖ್ಯಾತ್ಮಕ ವಿಶ್ಲೇಷಣೆ, ಫಝಿ ವ್ಯವಸ್ಥೆಗಳು, ಅನಿಶ್ಚಿತತೆಯ ಗಣಿತೀಯ ಮಾದರೀಕರಣ ಹಾಗೂ ಆಪ್ಟಿಮೈಸೇಶನ್ ವಿಷಯಗಳಲ್ಲಿ ಇವರು 94ಕ್ಕೂ ಹೆಚ್ಚು ಸಂಶೋಧನಾ ಪ್ರಕಟಣೆಗಳನ್ನು ಹೊರತಂದಿದ್ದಾರೆ.
ಕರ್ನಾಟಕ ಸರ್ಕಾರದ ಕಾಲೇಜು ಶಿಕ್ಷಣ ಇಲಾಖೆಯಡಿಯಲ್ಲಿ ಸೇವೆ ಸಲ್ಲಿಸುತ್ತಿರುವ ಇವರು, ತುಮಕೂರಿನ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಶೈಕ್ಷಣಿಕ ಹಾಗೂ ಬೋಧನಾ ಜವಾಬ್ದಾರಿಗಳ ಜೊತೆಗೆ ನಿರಂತರವಾಗಿ ಉನ್ನತ ಮಟ್ಟದ ಸಂಶೋಧನಾ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಸರ್ಕಾರಿ ಕಾಲೇಜಿನ ಪ್ರಾಧ್ಯಾಪಕರೊಬ್ಬರು ಜಾಗತಿಕ ಮಟ್ಟದ ಈ ಅತ್ಯುನ್ನತ ಗೌರವಕ್ಕೆ ಪಾತ್ರರಾಗಿರುವುದು ಜಿಲ್ಲೆಗೆ ಹಾಗೂ ರಾಜ್ಯದ ಉನ್ನತ ಶಿಕ್ಷಣ ಕ್ಷೇತ್ರಕ್ಕೆ ಹೆಮ್ಮೆಯ ವಿಷಯವಾಗಿದೆ.
