ನವದೆಹಲಿ: ಔಷಧಗಳ ನಿಗದಿತ ಗರಿಷ್ಠ ಚಿಲ್ಲರೆ ಬೆಲೆ (MRP) ಮತ್ತು ಆಸ್ಪತ್ರೆಗಳು ರೋಗಿಗಳಿಂದ ವಾಸ್ತವವಾಗಿ ವಸೂಲಿ ಮಾಡುವ ಮೊತ್ತದ ನಡುವೆ ಭಾರಿ ವ್ಯತ್ಯಾಸಗಳಿದ್ದು, ಈ ಅಪಾರದರ್ಶಕ ದರಗಳು ಸಾಮಾನ್ಯ ಜನರಿಗೆ ದೊಡ್ಡ ಹೊರೆಯಾಗುತ್ತಿವೆ ಎಂದು ಸುಪ್ರೀಂ ಕೋರ್ಟ್ ಕಳವಳ ವ್ಯಕ್ತಪಡಿಸಿದೆ. ಔಷಧ ಬೆಲೆ ನಿಯಂತ್ರಣ ಆದೇಶದ (DPCO) ಅಡಿಯಲ್ಲಿ ಲಾಭಕೋರತನವನ್ನು ತಡೆಯಲು ಹಾಗೂ ಗ್ರಾಹಕರ ಹಿತರಕ್ಷಣೆಗಾಗಿ ಔಷಧಗಳ ಎಂಆರ್‌ಪಿ ಮೇಲೆ ಶೇ. 16ರಷ್ಟು ಮಿತಿಯನ್ನು ನಿಗದಿಪಡಿಸುವ ಏಕರೂಪದ ಪರಿಹಾರವನ್ನು ಸುಪ್ರೀಂ ಕೋರ್ಟ್ ಪ್ರಸ್ತಾವಿಸಿದೆ.
ನ್ಯಾಯಮೂರ್ತಿ ವಿಕ್ರಮ್ ನಾಥ್ ಮತ್ತು ನ್ಯಾಯಮೂರ್ತಿ ಸಂದೀಪ್ ಮೆಹ್ತಾ ಅವರನ್ನೊಳಗೊಂಡ ಪೀಠವು ಈ ಕುರಿತು ವಿಚಾರಣೆ ನಡೆಸಿತು. ವಿಚಾರಣೆಯ ಸಂದರ್ಭದಲ್ಲಿ ಗಂಭೀರ ಉದಾಹರಣೆಯೊಂದನ್ನು ಉಲ್ಲೇಖಿಸಿದ ಪೀಠವು, ಮಾರುಕಟ್ಟೆಯಲ್ಲಿ 22,437 ರೂಪಾಯಿ ಎಂಆರ್‌ಪಿ ಹೊಂದಿರುವ ಇಂಜೆಕ್ಷನ್, ಚಿಲ್ಲರೆ ಮಾರಾಟಗಾರರಿಗೆ ಕೇವಲ 3,520 ರೂಪಾಯಿಗೆ ಸಿಗುತ್ತದೆ ಎಂದು ಬೆಟ್ಟು ಮಾಡಿತು. ಹೀಗಿರುವಾಗ ಮಧ್ಯದಲ್ಲಿ ಉಳಿಯುವ ಈ ಭಾರಿ ವ್ಯತ್ಯಾಸದ ಹಣ ಅಂತಿಮವಾಗಿ ಯಾರ ಜೇಬಿಗೆ ತಲುಪುತ್ತಿದೆ ಎಂದು ನ್ಯಾಯಪೀಠ ತೀವ್ರವಾಗಿ ಪ್ರಶ್ನಿಸಿತು.
ರೋಗಿಗಳು ಅನಿವಾರ್ಯವಾಗಿ ಆಸ್ಪತ್ರೆಯ ಒಳಗಿನ ಔಷಧಾಲಯಗಳಿಂದಲೇ ದುಬಾರಿ ಬೆಲೆಗೆ ಔಷಧಗಳನ್ನು ಖರೀದಿಸಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಹೊರಗಿನ ಅಂಗಡಿಗಳಲ್ಲಿ ಕಡಿಮೆ ಬೆಲೆಗೆ ಸಿಕ್ಕರೂ, ಅವುಗಳ ಗುಣಮಟ್ಟ ಮತ್ತು ಅಸಲಿಯತ್ತಿನ ಬಗ್ಗೆ ಜನರಲ್ಲಿ ಸಂಶಯ ಮೂಡುವಂತೆ ಮಾಡಲಾಗಿದೆ ಎಂದು ಕೋರ್ಟ್ ಕಳವಳ ವ್ಯಕ್ತಪಡಿಸಿತು. ಇದೇ ವೇಳೆ ಖಾರವಾಗಿ ಪ್ರತಿಕ್ರಿಯಿಸಿದ ನ್ಯಾಯಮೂರ್ತಿ ಮೆಹ್ತಾ ಅವರು, ಜನರು ಹೊರಗಿನ ಅಂಗಡಿಗಳಲ್ಲಿ ಕಡಿಮೆ ಬೆಲೆಗೆ ಔಷಧ ಪಡೆಯಬಹುದಾದರೂ ಕಾರ್ಪೊರೇಟ್ ಆಸ್ಪತ್ರೆಗಳು ಯಾರನ್ನೂ ಬಿಡುವುದಿಲ್ಲ. ಕೊನೆಗೆ ಹಣ ಪಾವತಿಸದಿದ್ದರೆ ಮೃತದೇಹವನ್ನೂ ಹೊರಗೆ ತೆಗೆದುಕೊಂಡು ಹೋಗಲು ಬಿಡುವುದಿಲ್ಲ, ಸಾಮಾನ್ಯ ಮನುಷ್ಯ ಈ ಎಲ್ಲಾ ಕಿರುಕುಳವನ್ನು ಏಕೆ ಅನುಭವಿಸಬೇಕು ಎಂದು ಆಕ್ರೋಶ ಹೊರಹಾಕಿದರು.
ವಿಚಾರಣೆ ವೇಳೆ ಹೆಚ್ಚುವರಿ ಸಾಲಿಸಿಟರ್ ಜನರಲ್ ಐಶ್ವರ್ಯಾ ಭಾಟಿ ಅವರು, ಸದ್ಯ ಚಾಲ್ತಿಯಲ್ಲಿರುವ ನಿಯಂತ್ರಣ ಚೌಕಟ್ಟು ಮತ್ತು ಅದರ ಹಿಂದಿನ ತರ್ಕವನ್ನು ನ್ಯಾಯಪೀಠದ ಪರಿಶೀಲನೆಗೆ ಸಲ್ಲಿಸಿದರು. ಪ್ರತಿಯೊಂದು ವೈದ್ಯಕೀಯ ಸಾಧನ ಮತ್ತು ಔಷಧವೂ ಅಗತ್ಯ ಸರಕುಗಳ ಕಾಯ್ದೆಯ ವ್ಯಾಪ್ತಿಗೆ ಬರುವುದರಿಂದ, ಎಂಆರ್‌ಪಿ ಮೇಲೆ ಶೇ. 16ಕ್ಕಿಂತ ಹೆಚ್ಚಿನ ದರ ಇರಬಾರದು ಎಂಬ ನಿಯಮ ಅಳವಡಿಸಿಕೊಳ್ಳುವುದು ತಾರ್ಕಿಕ ಮಾರ್ಗದಂತೆ ತೋರುತ್ತಿದೆ ಎಂದು ಸಾಲಿಸಿಟರ್ ಜನರಲ್ ಅಭಿಪ್ರಾಯಪಟ್ಟರು. ಸುಪ್ರೀಂ ಕೋರ್ಟ್ ಈ ಪ್ರಮುಖ ವಿಷಯದ ಮುಂದಿನ ವಿಚಾರಣೆಯನ್ನು ಅಕ್ಟೋಬರ್ ಎರಡನೇ ವಾರಕ್ಕೆ ನಿಗದಿಪಡಿಸಿದೆ.
